Kryetari i Komunës së Prishtinës, Përparim Rama, ka bërë të ditur se rreth 50 për qind e shkollave në Kryeqytet kanë çështje të sigurisë ku duhet të intervenohet.

Në një postim në Facebook, Rama ka njoftuar se raporti i sigurisë i realizuar në shkollat e Kryeqytetit nga Drejtoria për Siguri dhe Emergjenca ka treguar se rreth 50% e shkollave kanë çështje të sigurisë ku duhet të intervenohet.

Ai ka bërë të ditur gjithashtu se për këtë çështje ka ftuar në takim drejtorët e të gjitha shkollave të Kryeqytetit, së bashku me përfaqësues nga Policia e Kosovës, Shërbimi Zjarrfikës dhe Shpëtimit, si dhe drejtorët e disa drejtorive komunale.

“Raporti i sigurisë i realizuar në shkollat e Kryeqytetit nga Drejtoria për Siguri dhe Emergjenca ka treguar se rreth 50% e shkollave kanë çështje të sigurisë ku duhet të intervenohet. Duke pasur parasysh rëndësinë e kësaj çështjeje, kam ftuar në takim drejtorët e të gjitha shkollave të Kryeqytetit, së bashku me Policinë e Kosovës, Zjarrëfiksat dhe drejtorët e Arsimit, Inspekcionit, Investimeve Kapitale, Transformimit, Mobilitetit, Shërbimeve Publike, si dhe Sigurisë dhe Emergjencave. Qëllimi i këtij takimi është që ta shqyrtojmë në detaje raportin e sigurisë dhe të identifikojmë menjëherë hapat konkretë që duhet të ndërmerren. Në këtë proces, çdo drejtori do të marrë përgjegjësitë që i takojnë sipas fushës së saj, ndërsa një pjesë e masave do të adresohen edhe nga vetë menaxhmentet e shkollave. Siguria në shkolla është një përgjegjësi e përbashkët institucionale dhe shoqërore.”, ka shkruar Rama.

“Zero kompromis kur është në pyetje siguria e fëmijëve tanë”, u shpreh kryetari i Prishtinës./Arbresh.info